Жаңалықтар

«Сәулелі жырдың сарбазы» атты әдеби кеш

  Байғанин аудандық Мәдениет үйінде Қазақстан Жазушылар одағының мүшесі, Байғанин ауданының Құрметті азаматы, ақын, жазушы Жақсылық Айжанұлының шығармашылығына арналған «Сәулелі жырдың сарбазы» атты кеш өтті.
Шара ақынның мерейлі 75 жасына орай ұйымдастырылып, туған жердің қадірлі перзентіне деген ыстық ықылас пен құрметке толы кеш болды.
Аудан әкімі Айбек Купенов құттықтау сөз сөйлеп, ақынның әдебиет пен руханиятқа қосқан үлесін атап өтті. Ақынның иығына шапан жауып, ат мінгізіп, зор құрмет көрсетті.  Кеш барысында Жақсылық Айжанұлының жаңа «Күз» атты кітабының тұсауы кесіліп, жыр сүйер қауым жылы лебізін білдірді.  Жыр мен сөздің мерекесіне айналған бұл кеш – ұлт руханиятына қызмет еткен тұлғаның еңбегіне деген лайықты құрмет болды.

«Кітапханалық панорама – 2025» семинар.

  24 қазан- Кітапханашылар күніне орай «Кітапханалық панорама – 2025» атты кітапханашылар арасында семинар өтті.Сонымен қатар «IQ BATTLE» атты танымдық квиз ұйымдастырылып, кітапханашылар өз білімдерін, логикалық ойлау қабілеттерін және командалық жұмыс дағдыларын көрсетті. Жеңімпаз командалар мен белсенді қатысушыларға естелік сыйлықтар табысталды.
https://www.instagram.com/p/DQMKZFLCBNu/?img_index=1

«ӨНЕРДІҢ ӨРІСІН КЕҢЕЙТКЕН ТҰЛҒА»

  Байғанин ауданында мәдениет саласының қалыптасуы мен дамуына өлшеусіз үлес қосқан, КСРО «Мәдениет саласындағы үздік қызметі үшін» төсбелгісінің, «Құрмет белгісі» орденінің иегері, белгілі мәдениет қайраткері Сарыбаев Сүндет Сарыбайұлының 90 жылдығына арналған «Өнердің өрісін кеңейткен тұлға» атты тұлғалық кеш ұйымдастырылды.  Іс-шараның мақсаты – аудан мәдениетінің дамуына елеулі үлес қосқан ардақты азаматтың өнегелі өмір жолын, ел үшін еткен еңбегін өскелең ұрпаққа насихаттау, рухани мұрасын дәріптеу болды.
  Кеш аясында мәдениет майталманының өмірі мен қызметін танытатын арнайы көрме көпшілік назарына ұсынылды. Көрмеге Байғанин аудандық музей үйі мен орталық кітапхана қорында сақталған құнды жәдігерлер қойылды. Мұнда Сарыбаев Сүндет Сарыбайұлының жеке пайдаланған бұйымдары, түрлі жылдары түсірілген фотосуреттері, құжаттары, қызметтік жазбалары, марапаттары мен төсбелгілері, сондай-ақ ол туралы жазылған мақалалар орын алды. Сахна төрінде «Мәдениеттің торысы» атты портреттік хикая қойылымы сахналанып, арнау-өлеңдер оқылды. Ән мен терме орындалып, Сүндет Сарыбайұлының замандастары мен әріптестері естеліктерімен бөлісті.
Шара барысында 2019 жылы жарық көрген «Сарыбаев салған сара жол» кітабының жалғасы іспетті «Сүндет Сарыбаев: Байғанин ауданында мәдениет саласының қалыптасу және даму тарихы» кітабының тұсауы кесілді. Бұл еңбек мәдениет қайраткерінің өмір жолы мен еңбегін жан-жақты қамтып, жас ұрпаққа үлгі боларлық тағылымды деректерге толы.Кешке аудан әкімі, зиялы қауым өкілдері, мәдениет қызметкерлері, ардагерлер мен жергілікті тұрғындар қатысты. Қатысушылар Сүндет Сарыбайұлының ел мәдениетін өркендетуге қосқан үлесін айрықша атап өтіп, оның өнегелі өмірі мен еңбегін болашаққа үлгі ретінде бағалады.Бұл тағылымды кеш – мәдениетіміздің алтын қорына еңбек сіңірген тұлғаға деген халықтың құрметінің белгісі болды.

Мөңке бидің 350 жылдық мерейтойы кең көлемде аталып өтті.

  Халқымыздың дана биі, көреген, болашақ болжампазы – Мөңке бидің 350 жылдық мерейтойына арналған ауқымды іс-шараға Байғанин ауданы да өз үлесін қосты.
Аудан атынан екі киіз үй тігіліп, қонақтар ұлттық нақышта, ерекше құрметпен қарсы алынды. Дастархан жайылып, дәстүрлі ән мен жырдан шашу шашылып, ел рухын көтерген өнерпаздар өнер көрсетті.
Бұл — өткенді ұлықтап, болашаққа бағдар беретін тарихи сәттердің бірі болды. Еліміздің бірлігі мен рухани байлығын дәріптейтін осындай шаралар жалғасын таба берсін.
https://www.instagram.com/p/DO5rp5qiC6c/

«Бір ел - бір кітап» акциясы

"Бір ел - бір кітап" акциясына алынған көрнекті ақын, жазушы, әдебиет сыншысы, Тәкен Әлімқұлов шығармашылығы таңдалып алынған болатын. Осы орайда оқырмандарға "Жазушы және уақыт" атты ақпараттық сағат өткізілді.

«ОТБАСЫМ - ТӘРБИЕ ҰЯСЫ»

Аудандық орталық кітапханада, Халықаралық отбасы күніне орай аудандық аналар кеңесі, асыл әжелер алқасы, жастар ресурстық орталығы, аудандық мәдениет үйі бірлесіп “ Отбасым - тәрбие ұясы” атты дөңгелек үстел ұйымдастырылды. Іс-шараға ауданымызда үлгі тұтарлық, аудандық, облыстық, республикалық “Мерейлі отбасы” байқауының жеңімпаздары, Спановтар отбасы, ұлағатты ұстаздар Сүйесіновтер отбасы, Нұрқасымовтар отбасы. Аудандық, облыстық “ Абысын тату болса...” абысындар байқау жеңімпаздары, Көрпебаевтар отбасы қатысты. Кеш барысында отбасы құндылықтары жайлы пікір алмасылып, қатысушылар өздерінің өмірлік тәжірибелері мен қызықты естеліктерімен бөлісті. Сонымен қатар әндер орындалып, көркемсөз оқылып, күй тартылды. Шара қонақтарына алғыс хаттар беріліп, арнайы сыйлықтар табысталды. Іс-шара отбасылық құндылықтарды насихаттап, көпшілікке жылы әсер қалдырды.

            «Ерлік пен еңбек – ел мұрасы»

28 тамыз күні Белсенді ұзақ өмір сүру орталығында Байғанин аудандық ардагерлер пленумы өтті.Шара аясында Аудандық орталық кітапхана «Ерлік пен еңбек – ел мұрасы» атты жылжымалы кітап көрмесін ұйымдастырды.Көрмеге өңірімізден шыққан ақын-жазушылар мен ғалымдардың еңбектері қойылып, қатысушылар назарына ұсынылды.